Wayu 22:1-21

 Niyo ineenik aganaka nage kagagerak wone

1-2 Ti kage nagarik wonage me, malayikat nogo nen, an yo’nege logonet, “Niyo aakumi ineenik aganaka eneeri mili lombok mbini kin nogo, Ndomba Aagaluk Ala imbirak wone lengganogo yorogo menggam abu’me nen, kilak togon wungge nagaarik, o kota tu yarak eraaninu nage ti, kenegen pekket o,” yinuk, yo’nege mbaki, pekkage me, niyo nggwok nage nogo aa’nggi yibagan-enebagan eyo aakumi ineenik aganake menggerak awi yarak me, tut ambi penengge paga ne ambit paga anggen yi’nage, tut ambi penengge paga ne ambit paga anggen yi’nage, togoparet eerit tahun ambit eerak paga ne 12 paga aret anggen yi’nage kagarak. Ndi, eyoongga nogo ti, yi aakumi ndi aakumi andi aganake kero, obeelom aganaka inake aret wonage kagarak.

3 Yi mendek ndi mendek pulunogo pereegerak maluk wonage nogo tigitogon obeelom eerogo pegerak me, o nogo ti, obeelom mban aret wonage kagarak. Ndi, at Ala inom, Ndomba Aagaluk inom, imbirak it wone lengganogo yorogo menggam eyo ndoonak o oolo taati wonage kagak, at Ala ayeloman mini abok aret at owagam ninggippunuk logonet, at mban alut eekwi iigirak.

4 At mban alut eeko logonet, etenggen liippugwi iigak, at endage inenggaawak paga liiru mbanak wonage kagarak o.

5 Time o kiip age, o weege, eeka’lek o liingge mban wonage kagak, it aakumi nen Ala eya paga nugu logogun me, nugu logonet, “O eya aruwak nduk, oonegen wundi wage, ndi, ndi wuninggwi, eeruwak lak ao,” mbaka’lek it aap inendagembogut negen logonet, mondok-mondok wone lengganogo yorogo logogun o.

Yetut woroorak wone

6 Ti’nuk, at wone yo’nege nogo nen ambinom yo’nege logonet, “At Aberiniki nogo it aap Ala yorage kagak yoraga inikime logonet yorage kagak, aakumi yorogo logowak nduk, nappi wagagerak ninogoba Ala nogo nen logonuk lek mbet-mbet eeriyak wone nogo, at ayeloman mini ineenu aruwak nduk, ayonggo nage menggerak malayikat ambi nappi wagaarak. Nappi wagaarak nogo nen wone yokkegerak nogo abok aret, Yi abet aret, yo’negerak me a’me nggelok yigin, mbake logot o.

7 An mbet-mbet woraagin o, yinuk, yegerak me yokkigi o. Ndi, peebi eeriyak wone an yokkege neegak, liiru mbanggendak nogo, it aakumi liippunuk, mugurok nogwe iinok, iniki ale’nggen aret kogo logogun o,” yinuk, yo’nege kagarak.

8 Wone agan wagaarak naruk konengge, eerit wagaarak nenegen kage, eekirak nogo ti, an Yaya aret me, naruk konengge, nenegen kage, eeke nagarik, at peebi eeriyak wone yo’negerak malayikat nogo alut eerikit nduk, abu’me tebe ari mbaki,

9 at nen an yo’nege logonet, “Togop eerugun o. It koreewi Ala nen yorage kagak yoraga inom, it wone liiru mbanggendak liippunuk mugurok nogo logomenggaarak nogo inom, kat inom, an kit pogom Ala ayeloman aret me, Ala mban alut eeke logot o,” yinuk, yo’negerak.

10 Yo’nege nagaarik, “Peebi eeriyak wone yokkege neegak liiru mbanggendak nogo, eeriyak abu aret panggo yi wagaarak me, wone ti, kumaapporogo logorak mage o. Ata, yi aap ndi aap yoranet nege logot o.

11 Yoranet nege keegak kwe, it maluk eeko logorak mbakwi kenok, maluk aret eekwi, ndi, eeriyak lek mendek kagak ugun-ugun eerit nogo logorak mbakwi kenok, ugun aret eerit nogwe, ndi, it ando maluk eeka’lek obeelom mban eeko logorak mbakwi kenok, obeelom mban eerit nogwe, ndi, it ando kikak naka’lek Ala ake mban leenak logorak mbakwi kenok, Ala ake leenak wonogwe, eekkologo logowak o,” yinuk, yo’nege kagarak.

12-13 Yo’nege kage nagarik, at Yetut nen, “O maan aa’nduk togon wonagagirak alom Alpa inom, peebi irip paga mondok logorak Omega inom, ti an mban aret me, an logonuk lek mbet-mbet wage logominggirik, yi aap ndi aap eeko logomenggaarak paga onggo wogoroorak mbakirak nogo inalitik-inalitak ndak-ndak wogora woraagin me, liippogo logowak o,” yinuk, yo’nege kagarak.

14 Yo’nege kage nagarik, “It inambogoyum laambu kookkologo me-nggaarak nogo, Eyo ineenik aganaka anggen nunggwi, ndi, o kota tu paarak mban wonage yime nowagam unggwi wogwe, eeko logonip o, yinuk, yorage neenok, iniki ale’nggen mbakak o kota unggwi nogwe iigak kwe,

Ayat 15 :

1. it nggeewo pogom eeko menggaarak inom, 
2. magagirak iyagalo inom, 
3. yawukak mbabilu inom, 
4. aap inooka inom, 
5. kugi eeka inom, 
6. ndi, yi aap ndi aap pilit puguniyak inikilom mbako logonet, pilit-pilit pugungga inom, it perak, o kota time unggwi naga’lek yagat endekem logogun o.

16 Kit an napuri yi awi ndi awi kuwak eerit nogo monggotak nogo, peebi eeriyak wone yi, paganogo yokkira woraawak nduk, nayonggo nege menggerak malayikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut paga wiganak agarip ndarak nogo an aret o,” yinuk, yo’negerak.

17 Yo’nege mbaki, malayikat nogo nen ambi yo’nege logonet, “It aakumi niyo abu aganake kenok, niyo ineenik aganaka nogo mendek onggo lek we aret tookkola woraawak nduk, Aberiniki inom, Ndomba Aagaluk akwe nogo inom, imbirak nen, Wa’nip o, yinuk, muk yorogo agaarik o. Ndi, it wone yi, konembunuk abet mbakwi iinok, Na wa’nip o, yinuk, wiirogo logowak nduk, yoret o,” yinuk, yo’nege kagarak.

Irip paga yoge kagagerak wone

18 Ti yo’nege nagaarik, ambinom yo’nege logonet, “Peebi eeriyak wone yokkege neegak liiru mbanggendak nogo, aakumi konembunuk, wone alik ambi inom nabenogo pugwi iinok, andi-pandi aganaburak kugi alom 7 porogo wonogwe iige nagandik, liiru mbanggendak nogo nen inooruwak nduk, Ala nen nappiya woraagin o.

19 Ndi, at Ala nen, Ineenik aganaka anggen nunggwi, o kota obeelom alik leenak nogome unggwi nogwe, eeko logorak o, yinuk, yereegerak mbuku yi paga liiru mbanak wonage kwe, peebi eeriyak wone yokkege neegak liiru mbanggendak yi, aakumi nen konembunuk, ando waganggo logonet, Ando ti woorak lek o, yinuk, mbo pugwi iinok, at Ala nen it aap ti, anggen nogo nunggwi, ndi, o kota nogome unggwi nogwe, eerugun lek, Kit endekem aret logonip o, yinuk, yoraagin.

20 Kat keenu a’nok nduk, wone yi, paganogo yokkegerak nogo nen, An logonuk lek mbet-mbet wagi o, yinuk, abet aret ari kagarak me, wone ti, abu aret yokkigi o,” yinuk, yo’nege kagarak. Yo’nege mbaki, an nen, “Noweeluk Yetut mbet-mbet woraawak lak ao,” yinuk, “Amin,” yagarak.

21 Kit kinowe Yetut nogo iniki kunik en obeelom eeppinagage logonet, kinarum aret logogin o. Amin.

Wayu 21:1-27

Mbogut-nggween ngget ogobakkigirik kagagerak wone

1 Ti eeke kage nagarik, wonage me, mbogut-nggween aa’nduk wakkagagerak nogo inom, yi nggwok yenggenak laut nogo inom, lek age kagak, obaane’me mbogut-nggween ngget ogobakkigirik nogo ari wage kagarak.

2 Kage nagarik, kwe ambi ogonggelo kolaakit nduk, amindik-amendek li’luk eekko’nok wage menggi kwak, o kota abu alik leenak Yerutalem ngget ogobakkigirik nogo, Ala wonage me mbogut paga nen wambi wage kagarak.

3 Wambi wage mbaki, wone lengganogo yorage menggim time nen oone nggwok ambi ari logonet, “Ala at apuri inenggela’me logowam nogome logokit nduk, eebe wambi wage ti, kaanip o. At eebe nogo apuri inom logonet, it nen, Kat ninogoba Ala aret o, yinuk, yogwi, ndi, at nen, Kit an napuri aret o, yinuk, yorage, eeko logogun o.

4 Mbogutnggween aa’nduk ogobakkigirik nogo paga logonet, iniki aaninggin kogo nogogwaarak nogo, lek agaarak me, ngget ogobakkigirik nogo paga inogoba Ala inom logonet, inale amburu mbanogo piyamenggerak me, kanggwi, tabun ndoombunuk le yogwe, iniki wakkologwe, andi kogwe, eeko logogun abu lek o,” yinuk, ari naruk konenggirak.

5 Ari naruk konembunuk, wonage me, at wone lengganogo yorage menggim eyo ndoonak paga kwi’ndak wonage nogo nen an yo’nege logonet, “Wone yi, liirogon karuk konengge logot o. An nen yi mendek ndi mendek abok aret ngget ogobakkigirogo pege yi, abet aret a’me nggelok yigin me, liiru mbanu o.”

6 Yo’nege nagaarik, ambinom yo’- nege logonet, “O maan aa’nduk togon wonagagirak alom Alpa inom, ndi, irip paga mondok logorakOmega inom, ti an aret me, yokkigirak nogo ti, muk eeke me nduk yokkigi o. It aakumi niyo abu eeginake kenok, an nen niyo ineenik aganake menggerak eneeri wungge me nen onggo lek we aret toologo wogorage logogin o.

7 It an noone mbo pega’- lek inogogumbuk logonet, liirogon mugurok nogwe iinok, ineyate wogorogo mengga kwak, eeginaburak wone karuk konenggendak nogo eeginake logominggirik, an inogoba Ala aret age, ndi, it an napuri aret ogwe, eeko logogun kwe,

Ayata 8:

1. it Ala wone mugurok noorak inagabiti mbaka inom, 
2. abet mbariyak ineebi mbaka inom, 
3. maluk peyak wurik kagak ugun eerit nega inom, 
4. aakumi inooka inom, 
5. kumi ugun wurinaka inom, magagirak iyagalo inom, 
6. kugiwak amili kungga inom, 
7. pilit pugungga inom, 
8. it abok aret it logowam pipuk eerogo pereegim kani omoonuk wunuk mban ari menggim nogome mbo nappiyaagin o. Aa’nduk ineenik logonuk, kambemenggaarak kwe, kani omoonu’me nappiyoorak nogo ti, peebi ne ambi kanggwi nogo kokwak aret o,” yinuk, yo’nege kagarak.

O Yerutalem ngget ogobakkigirik kagagerak wone

9 Yo’nege mbaki, malayikat ineebe 7 nogo nen aakumi andi aganaburak kugi alom 7 togolowa’na toolak porogo wonagaarak nogo, ambi nen nowagam wage nagaarik, yo’nege logonet, “Ndomba Aagaluk akwe kolegerak kolaga nogo, kenegen kaanok nduk, mok o.”

10 Yo’nege nagaarik, Aberiniki ninikime lik ari mbaki, neebe wo’neren puut nggwok tiyarogon nogo paga pani lagangge nagaarik, o kota abu alik leenak Yerutalem ngget ogobakkigirik Ala wonage me mbogut paga nen wambi wage, “Ti ket o,” yinuk, yo’negerak.

11 Yo’nege mbaki, yugum onggo nggwok pugagi pogom endage yatipit nogo mendek pindan-pindan eeke menggi kwak, o kota ngget ogobakkigirik pindanpindan eeke ti, Ala tiyanak logonet, eya ndelenak-welenak aago menggerak nogo nen aret eeke kagarak.

12 Ndi, o wa’nagat wurik ti, mondok iya tiyarogon wurik me, tu pak mbanak 12, ndi, tu pak mbanak unde nogo ti, it malayikat ineebe 12 mban wonogwe iigirak. Ndi, tungga eebe paga aakumi Iterali inanebunu 12 nogo inendage liiru mbanak wonage kagarak.

13 O wa’nagat wurik oonegen lagi wage menggim pa’nggwe tu pak kenagan mbanak, ndi, oonegen kilu yi nage menggim pa’nggwe tu pak kenagan mbanak, ndi, o ame kwi’nari nage menggim pa’nggwe tu pak kenagan mbanak, ndi, o omarip paga kwi’nari wambi wage menggim pa’nggwe nogo ti, tu pak kenagan mbanak mban wonage kagarak.

14 O wa’nagat wurik ogowa pugu yugum 12 wonage nogo paga at Ndomba Aagaluk awuri nappiigak mendek ineebe 12 inendage mbanak wonage kagarak.

15 Ndi, at wone yo’negerak nogo nen o kota inom, tu pak mbanak nogo inom, o wa’nagat wurik inom, wakkaakit nduk, wakkagak mbuti emas paga ogobakkigirik eenggime wonage kagarak.

16 Nenegen neegak, at nogo nen o kota nogo wakkagak nogo paga wakkage logonet, irip agi-ogu inom, aru-ogwe inom, o eyak kirin nippugu inom, ti dua ribu dua ratus kilometer negen wakkagak wurik kagarak.

17 At malayikat nogo nen o kota wurik wakkage nagaarik, ti’nuk, o wa’nagat eebe wurik ambe mban wakkage mbaki, at wakkagak nogo paga wakkagagerak nogo ti, nit aakumi wakkogo monggo kwak meter 65 paga wakkagak wurik aret kagarak.

18 O wa’nagat nogo ti, yugum yatipitnogo paga wurik, ndi, o kota nogo ti, mbuti emas at mendek paga mban pugagi abu kin lombok pogom nogo paga wurik kagarak.

19 O kota nogo, yi yugum ndi yugum abe kigirikwe kenok mban obaga lu’luk eerak ogowa pugu kagarak. Yugum tabak woneemaluk abena ndoonak ti, yugum yatipit. Ndi, yugum yatipit obaga pugu nogo ti, yugum nilan, ndi, yugum nilan obaga pugu nogo ti, yugum mira, ndi, yugum mira obaga pugu nogo ti, yugum tamurut,

20 ndi, yugum tamurut obaga pugu nogo ti, yugum unam, ndi, yugum unam obaga pugu nogo ti, yugum taririt, ndi, yugum taririt obaga pugu nogo ti, yugum era’na tembaka, ndi, yugum era’na tembaka obaga pugu nogo ti, yugum mberin, ndi, yugum mberin obaga pugu nogo ti, yugum kiritolit, ndi, yugum kiritolit obaga pugu nogo ti, yugum kiritoparat, ndi, yugum kiritoparat obaga pugu nogo ti, yugum latuwariri, ndi, yugum latuwariri obaga pugu irip paga nogo ti, yugum ketubun, yugum etenggen abe kigirikwe paga mban ta’mban-mban aago wurik kagarak.

21 Tungga eebe 12 nogo ti, yugum kundali negen ambit tabak paga mban alitik-alitak ogobakkigirik kagarak. Ndi, o kota oolo tu yarak ti, mbuti emas at mendek mban pugagi abu kin lombok pogom ndoonak kagarak kwe,

22 at Omaawi Lombok Menggerak ninogoba Ala inom, at Ndomba Aagaluk inom, Ala awi wurik negen ineebe inenggela’me inom aret wonogwe me, it aakumi Ala ninom wonage mbaruwak nduk, awi wurik nogo lek aret kagarak.

23 At Ala abu tiyanak eebe eya ndelenak-welenak eeke nogo paga o kota ti, eya eeke, ndi, ndi wuninik pogom ti, Ndomba Aagaluk nen aret eya eeke, eekwi me, it aakumi nen, “Oonegen inom, tut inom, eya aruwak lak ao,” yinuk, yaga’lek aret iigirak.

24 Yi aakumi ndi aakumi inanebunu lombok abok aret o eya ti paga nugwi, ndi, yi aap ndi aap inendagembogut nggween paga menggaarak abok aret o eya ti paga logowok nduk, inamindik-inamendek mbelenggo’nok unggwi nogwe, eekwi iigirak o.

25 O kota time o kiip age, o weege, eeka’lek mondok-mondok liingge mban wonage me, tu mondokmondok paarak aret wonage kagarak.

26 Yi aakumi ndi aakumi inanebunu lombok abok aret inendage abu obeelom tiyanak logonet, inamindik- inamendek mbelenggo’nok, o kota time logowok nduk, unggwi nogwe iigirak.

27 Ndi, it maluk inikime porogo wonogwe, maluk peyak wurik kagak ugun eerit nugwi, pilit pugunggwi, eeko menggaarak nogo kenok perak, unggwi nogwe iyoolik o. Ata, it aakumi ineenik mondok-mondok aganaburak inendage mbuku paga liiru mbanak Ndomba Aagaluk porogo wonage kenok mban unggwi nogwe iigirak o. 

Niniki Lonik Logorak wone

Thema : Niniki lonik logorak wone

Iyalok  wone. Kwe ambi aap miike nagatik, yarak me niige logonet a, yi eekak-ndi eekak eeke logonet a, we puk logonet a, iniki nogo ti aap miremegerak nogo paga mban lonik wonagatik, lambumbugwi iinok, imbirak wonage logonet perak mari iniki lonik logomenggerak nogo mari age menggerak o.

Kiwone. 2 Pet 3:16. 
Ninuwe mbet-mbet wagalek kenok ti, nit abok ninagap ndaruwak nduk too’nige me, niniki ndege- nggolorak nanonggwaan aret o.

Niniki lonik logorak Wone alom 3 aret o.

1.      Hari Minggu paga niniki lonik logorak wone

2.      Yi hari-ndi hari ninniki lonik logorak wone. 

3.      Mbugut paga noorak niniki lonik logorak wone.

I.  Hari minggu paga niniki lonik logorak wone. Mark  16:2

1. Kubondok mi’nanuk tamban eeriyak.
2. Jam 6 paga mbuku pikkoorak.
3. Jam 7 nggu’mo wari noorak.
4. Jam 8 Gerejana paga woroorak.
5. Tamban eekwi, ndawi yogwe, Ala wone yogwe, eekwi iigak, niniki mbininggolage logorak
6. Minggu abu eeppunuk niname noorak.
7. Niname nanuk, Yi eekak-ndi eekak eeriyak mage, Ala wone yo'niramenggaarak nogo mban niniki mbininggwi, Mbuku Lunggwi, Mbi-mbingga laroogo nunggwi, eekwi we puk aret logorak. ( Wak. 2:3 ) 3 At Ala nen yi mendek ndi mendek abok aret wakkage nagagerik,ne ambi 7 paga tat yonggonggolage puk wonagagerak me, ne ti nogoat ale’nggen mbake logonet, ake leenogo pateegerak.
8. (Wunde 16:29-30 ) 29 Naliku an ALA nen nogo 6 yinuk, ko’lu paga kit yonggonggologo logonet, nalut eeko logomunggup nduk, wokkiragagirak me, Ne 6 paga ti, mbi ne mbere noorak ake wo’nirage logogin o, yinuk, liippogo logonet, ko’lu ti paga kit ambit nen endekem wundi naga’lek kiname mban aret puk logomunggup o.” 30 Yorage mbareegi, it aakumi Iterali nogo 6 yippunuk, ko’lu paga yabu eeka’lek tat yonggonggologo nogogwaarak.
9.  ( Wunde ( 20:8 )  Nogo 6 yippunuk, ko’lu ti, nake leenak aret me, abeko logonip o.
   
   
10. Wunde. (31:13 )  “Aakumi Iterali yoroorak nogo yi aret. Nogo 6 yippunuk ko’lu paga ti, an nake leenogo pateegirak me, it nen mondok liirogon abeko logonet, nayuk wuko logowak o.
     
11. Wunde. (31:14) Aap ambi nen nogo 6 yippunuk, ambi 7 nake leenak ti paga taganogo punuk, yabu eeke kenok, at eeremenggerak nogo onggo kambuurak aret me, aap ambi nen nogo 6 yippunuk, ambi 7 nake leenak ti paga yabu eeremenggerak kenok, owe-awot inenggela’me nen enggaawak lek eerogo pogo logowak o.
    
    
12. Wunde 31:16-17) 16 Togop aret me, nogo 6 yippunuk, ko’lu 7 ti, it nen mondok-mondok aberak logowak nduk koonogo pereegirak me, it inapuri ndaganabit wundi woramenggaarak inom inale’nggen nen abeko logonet, nayuk wuko logowak o. 17 An inom, aakumi Iterali inom, mondok-mondok abeko logowok nduk, Naliku an ALA nen ne 1 nen nok ne 6 kuli mbogut-nggween wakkage nagagirik, ko’lu paga yabu eeka’lek we puk tat yonggonggolage wonagagirak nogo it aberak wonogwe iinok, an it ninom niniki kunik wonogwe neenu arigin, yegerak, yoret o,” yinuk, yoreegerak.
13. Ala Unde 19:3) Naliku inogoba Ala an aret me, inalitak lombok nen inagalominiinogobamini inayuk wukwi, ndi, nogo 6 yippunuk, ko’lu paga yonggonggologo logorak nake leenogo pateegirak nogo liirogon aret abekwi, eeko logowak o.
     
    
14. Ala Unde (19:30 ) 30 Naliku ALA an aret me, nogo 6 yinuk, ko’lu paga yonggonggologwe puk logowak nduk, leenogo pateegirak nogo abekwi, nawooliya wurik magame nogome ayuk wukwi, eeko logowak o.
15. Ala unde ( 23:3 )  Ne 6 paga ti, yabu eerit nogo logorak op aret kwe, ko’lu paga perak, an nake leenogo pateegirak me, it iname lombok abok aret yabu eeka’lek tat yonggonggologo logonet, kuwak eeppunuk, Naliku ALA nalut ee’nako logowak o.
    
    
16. Ala unde ( 23:32 ) Ne ti eyom ti, nogo 6 yippunuk, ko’lu paga yonggonggologo logorak nogo aret me, kit kinambe mage negen logonet, yabu eeka’lek tat yonggonggologo logomunggup o.
     
17. Ala unde 24:7-9 ). Oroti ti, nogo 6 yippunuk ko’lu tat yonggonggologwe puk logorak ti eyom paga Naliku ALA nenggaanom paga pani wagak eeko logowak nduk, koonogo pigirak me, it aakumi Iterali mendek nen mondok aret eeko logowak, yegerak, yoret o,” yinuk, yoreegerak.
    
    
18. Ala unde (26:2 ) Naliku ALA an aret me, nogo 6 yinuk, ko’lu paga yonggonggologwe puk logowak nduk, leenogo pateegirak nogo abekwi, ndi, nawooliya wurik magame nogome ayuk wukwi, eeko logowak o.
    
    
19. Ala wone mbanak paga togop aret yo'nirage me, Hari ambiret ke 7 nogo ti, Aliku Ala ake leenogo pategerak me, nit mondok ayuk wuko logonet, Ala wone mban niniki abekwi niigak nok o kip ari noorak kuli aret arinoorak o.

II. Yi ari-ndi ari ninniki lonik logorak wone. 

1. Hari senen kubondendok nen nok kiyoma ari noorak kuli niniki ndegenggologo logorak.

2. Nogo yikit nduk, kubondok nen nok kiyoma kuli niniki koonggirak inom, wone mbanggirak inom, nogo abok aret cek eeppunuk op mban aret konggirak, yagarak kenok, Ala unde wa’nakendak wa! Yunuk, tamban eeppunuk nogo yurak.
3. Ti’nuk, ko’lu kubondok neenik a’nuk, tamban eeke logonet, yogondak kubondok nen nok kiyoma kuli niniki kooniyak inom, wone aakumi ninom nonggop mbaniyak inom, kat nen "unde wa’nabumugun o," yinuk, tamban eeriyak.
4. Ti’nuk, Onikiya nogo yikit nduk, Kubondok kuli nen nok kiyoma jam ti kuli nogo niniki konggirak inom, wone mbanggirak nogo inom, iniki mbinimbunuk, op mban konggirak a, ando maluk konggirak a, nogo cek eeriayak. Op mban kenok Ala Aberiniki unde wa'nakendak wa! yinuk, keyage wariyak.

5. Minggu ambi anikime Hari senen kuli nen nok hari Sabutu kuli op mban aret ndegenakerak kenok, Ala alut ambik eeriyak.

6. Togop mban eerit nage negak kuli nok minggu ambi anggwi noorak. Ti’nuk mbulan ambi anggwi noorak. Ti’nuk, Tahun eeri noorak. togop mban eerit nogwe niigak, Tahun ambi anikime apit op mban aret eerit nogoorak kenok, Ala alut ambik eeko logonet, ninale’nggen eekologolorak. Mondok iya!

7. Ti eerit nogwe ninok, Ala nen yi paga-ndi paga ninabut mbaniyak nogo ambik wonage o. Iniki nu’lek wonage kamun a, iniki ndeyak wonage kamun a, yinuk, ninabut mbanigin me, nit niniki mondok wakkangget logonet, wone yi eerit nogo logoorak o.

      Nano nduk nit togop eerit nogwe nigak Yetut wa’ninabi wage logomigirik, nit keyage warogo              wa’ninabigin mbakop? Eebe mbuku yi.

    A. Wayu 22:11)..... “Ndi, it ando kikak naka’lek Ala ake leenak   mban logowok mbakwi kenok, Ala                                ake  leenak wonogwe,  eeko logowak o. yinuk, yo’nirage agarik.
   B. Wayu ( 19:8 ) inoone yogwe iigak, akwe nogo wage mbaki, ayum ambi abu yawenak kikak                   naka’lek abe laambu yanggwi negen lan aago yikkolawak nduk, wogoge kagarak. Ndi, ayum            abe yawenak nogo ti, it Ala apuri ake leenak nen maluk eeka’lek obeelom mban eerit nugwi                 nogo kwak aret kagarak.

     C.  Epetut.5:24. “An napuri inoba muli lenggenak ineebe  yinik-pinik ago ineebe yinuk punuk                     eerak   iigak kolorak  neebi o.”yinuk,  ari. Mbuku ando ambik wonage. 


   D. I Pet 1:15-16 At Ala nen ari logonet, “An maluk eekeelik alik leenak minggirak ndak-ndak, kit togon maluk eeka’lek alik leenak togop aret logonip o,” yinuk, yereegerak wone liiru mbanak wonage me, at Ala maluk eekeelik alik leenak menggerak nogo nen kinayonggo pereegerak me, kit togon maluk eeka’lek alik leenak logonet, eerit nogo logonip o.

E. Matiyut ( 5:8 )  It aakumi iniki kikak naka’lek obeelom mban menggaarak nogo ti, Ala inigen kaagun aret me, Iniki ale’nggen aret mbako logowak o.

  Alom ti paga nit netik-netak niniki-ninoone ndegenggologo  logorak.

 III. Mbugut paga noorak niniki lonik logoorak wone. Pilipi 3:20

1. Nit yime we nggiru negen wonogwe.
2. Ninawi ninawarak mbugut paga wonage.
3. Ninagabulo ngget yirippininaigin.
4. Ninawi ngget wa’niraagin.
5. Nineenik mondok-mondok logogun.

Ninawi logorak mogonak nogo eebe yi aret o:

1. Mbugut paga anikime logoorak.
2. Yagat andiken logoorak.
3. Kanimonuk me logoorak.

1. Mbugut paga anikime logoorak  niniki lonik logorak: Wayu 22:14

“It inambogoyum laambu kookkologo menggaarak nogo, Eyo ineenik aganaka anggen nunggwi, ndi, o kota tu paarak mban wonage yime nowagam unggwi wogwe, eeko logonip o, yinuk, yorage neenok, iniki ale’nggen mbakak o kota unggwi nogwe iigak kwe,... (Inambogoyum kuluk kookologo menggarak nogo ti eebe, yi ari ndi ari niniki Mili lenggenggolokwak nduk, ndegenggologwe ti aret nduk yeregerak o, norewi.

Mbugut paga anikime Yerusalem Baru logoorak nogo ninaneebenu 4 yi o:

1. Ala Yetut, Aberiniki.

2. Ala ayonggo nugu menggaarak Malaikat mendek.

3. Inanebenu Iterali mendek abet mbakwi nogo logoorak.

4. Nit aakumi andeken mendek Ala wone abet mbako nogogurik, ndegenggo monggoorak nogo. Ninanebeenu 4 ti aret niname mbugut paga Yerutalem Baru nogome Ninogoba ALa Ninowe Yetut ninom nineenik mondok-mondok aret logogun.

2. Yagat andiken logorak nogo it Muk abet mbako nogogwaarik, maluk yi mendek eeko menggaarak kenok logogun o: Wayu 22:15, 19.

1.    It nggeewo pogom eeko menggaarak inom, =eebe kumi agun-agun eerinabit nugwi.

2.    Magagirak iyagalo inom,

3.    yawukak mbabilu inom,

4.    aap inooka inom,

5.    kugi eeka inom,

6.    ndi, yi aap ndi aap pilit puguniyak inikilom mbako logonet, pilit-pilit pugungga inom, it perak, o kota time unggwi naga’lek yagat endekem logogun o.

7.    Epetut 5:3-5 Kit Ala apuri ake leenak aret kagak, kumi ugun wurinabit nugwi,

8.    kiniki kumi paga mban lunik logonet, ugun-ugun eerit nugwi,

9.    uugweu-ugwe mbakwi, eerit nugwi kiinok, it aakumi ando nen, “Ala apuri aret

kwe, maluk eekwi iyaanip o,” yinuk, kinombakwi.

10. Kumi inabok mban agan nugwi, elege negen ugun i’ndok kambuurak mban agan nugwi,

11. iniki kumi paga mban lunik logonet, inoonewak agan nugwi,

12. It kumi ugun wurinabit nogo menggaarak inom,

13. iniki kumi paga mban lunik logonet, inabok agan nugu menggaarak inom,

14. ndi, it uugwe-uugwe mbakwi nogo ti, aap kugiwak alut eekwi ndak-ndak aret me, it ti inom, it aap 14 kuli ti eeko menggaarak abok aret Ala Keritut imbirak inabu’me piigo menggam unggwi nagun mondok lek mbako logonip o.

Wologogowae! It Yagat andike logorak yi taamuni mbakop noreewi? Lek o. It Ala wone abet mba’nuk, tahun ne mande negen eeke kagak, Ala wone mugurok nogo logomenggaarak kwe, ne ambi Tile nen, 14 nomor lingginik agi’nggwe yi paga inabut mbangge kenok, eebe aret eekwi ti paga, mbugut paga anikime logoorak nogo lek eerogo pako menggarak me, yagat andeken aret logogun o, Ala Keritut imbirak inabu’me piigo menggam unggwi nagun mondok lek mbako logonip o. noreewi.

3. Kanimonuk me logorak nogo it aakumi  yi mendek eeko menggaarak kenok aret logogun o: ( Wayu 21:8 )

1.      It Ala wone mugurok noorak inagabiti mbaka inom,

2.      Abet mbariyak ineebi mbaka inom,

3.      maluk peyak wurik kagak ugun eerit nega inom,

4.      aakumi inooka inom,

5.      kumi ugun wurinaka inom,

6.      magagirak iyagalo inom,

7.      kugiwak amili kungga inom,

8.      pilit pugungga inom, it abok aret it logowam pipuk eerogo pereegim kani

9.      omoonuk wunuk mban ari menggim nogome mbo nappiyaagin o.

Aa’nduk ineenik logonuk, kambemenggaarak kwe, kani omoonu’me nappiyoorak nogo ti, peebi ne ambi kanggwi nogo kokwak aret o,” yinuk, yo’nege kagarak.

Noreewi wai, It kani omonuk me norak inom, it yagat andiken logorak inom, maluk eendage abu ndak-ndak aret wonage kwe, it kani omonuk me nagun yi alom ngge paga mbakop? Lek o. It kanimonuk me nagun nogo ti, alom nomor ambire 
1 It Ala wone mugurok noorak inagabiti mbaka inom, 
2 Abet mbariyak ineebi mbaka inom,) nomor ambire ti imbirak eerulik paga aret nappiyagin o.

It yagat andiken piyagin kogorak nogo ti maluk atinggen ndak-ndak aret eekaarak kwe, it alom muk abet mbareegwaarak kwe, maluk eerit nagaarak ti paga aret yagat andiken pengge agan nugu logowak nduk, Ala nen wumbiyagin o.  

It Kanimonuk me logorak nogoinanebeenu 4 yi aret logogun o:

1. Kepala  Tile nogo aret logogin o.

2. At awuri Melaikat Maluk mendek nogo logogun.

3. Inanebeenu Iterali mendek abet mbakalek kenok logogun.

4. Aakumi o nggwen paga wonogwe abet mbaka’lek mendek nogo logogun. It inanebenu 4 ti aret logogun o.

 Abo mbangge wone  :

Nit Niniki lonik logomundak nogo, ninogonggelo Yetut nen wa’ninabi wage logominggirik, wa’niren mbogut paga Yerusalem Baru anikime pinani nage kenok, ninom nineenik mondok-mondok logonet, niniki lonik logomundak nogo lek age logonet, obaani’me, niniki ale’nggen mban aret, Ala Yetut ineenik initok menggarak pugum aret logogun o.   

Ambokan time niniki lonik o alik me noorak ambi aberak logogun lek aret o. Ata, Logorak kuli Ala nen koonegerak ti kuli abu aret o. O wege o kiip age eeka’lek, o Liingge eya mban aret logogun o.

Ndi, o eya eeke nogo ti, at Ala eebe nen aret eya eeppunuk wonage kagak, ninali’nggen mban aret wonogo logogun o.

Eyo anggen aakumi ineenik aganake menggerak inom, Niyo aakumi ineenik aganake menggeerak inom, ti nunggwi niigak, Niniki koonage menggeerak alom inom, Andi-pandi ee'ninake menggerak alom inom, niniki Puuru ari menggeerak alom inom, abok aret kinogo wumbege logominggirik, obane'me, nineenik ninitok Ala menggeerak ndak-ndak aret eerogo pinanemenggerak me,  ninale'nggen mban awimban aret logogun o.

Togop aret me, norewi wa. Nit ninalitak lombok aret, niniki lonik ko’lu-ki’me niniki ninoone inom, ninobaabut inom, ndegenggologwe, yi paga ndi paga ninabut mbani wage kagak, niniki mondok nu'lek wakka’ngget logonet, ndegenggologwe, eeko logowok o.

Togop eeko logonet, 
1. aakumi abok aret inabuwa mbakwi.
2. Niniki kunik aganako logonet, obeelom eeppiinet nogwe,
3. Ala wone lenggenak eeriyak yogwe iinok niniki abeelom paga eerit nogwe, 
4. At ambi iniki Tebenak wonage kenok eyak wappegak eekwi,
5. Yenggwa-yenggwa eekwi, Aakumi abet mbaka'lek nogo abet mbaruwak nduk, Ala wone Lik-lak          mamunirogwe, 
6. It muk abet mbakarak kenok, Iniki ndegenggologo logorak mendek mamunirogwe, eeko logowok o. Ala wone mbanak Wakkagagerak kuli nen nok Wayu kuli abok aret anikime lambuk togon eeriyak nogo ti, yi aret me, An inom kit inom, ndak ndak aret eerit nogo logowok nduk, An Yusman B Enumbi nen Aberiniki niniki eyak wappangge kagak, Liiru yi mbanggi o.  noreewi Yetut paga kunik wa! Amin.!

----------------------------------------------------------------------